شفتها......مشاركة جماعيّة

[نور عقل]

شفتها عم تمشي وخطاها=تاركة خيالها ملقّح وراها
شفت نسمة عم تبوّس=الكحلة الذايبة في لمحة حلاها

بتمنّى مشاركة كل مين" شاف" أو "شافت" ببيتين او اكثر في الموضوع

تحيّاتي

[وديع توفيق مرجية]

شفتها عَ العين رايحة وحامله جرتها=جرحت قليبي بْحُسُن مُقلتها
ظلّيت قاعد محلّي وما بتحرّك=استـنّيت تا ترجع تَ اشربْ من ميّتها

[نور عقل]

شفتها والبسمة تصبغ وِجِهَّا=ورونق عينيها بالتدوير طاب
وعطر شفتو يكرج عا خصرها=وسهم حبّا هالقلب صاب

[وديع توفيق مرجية]

شفتها بْعُرُس لَصاحبِة الـخَدّ الأسيل =رقصَت وِشَعرا عَ الكِـتِف كانِ يِميل
ضاع العقِل يا ناس وِزاغِ البَصَر=بِوصالها بَسّ تِشفي لِلقلبِ العليل

وينك يا محمد علي الصالح ( أبو الياس ) ؟؟؟
وين هالغيـبِـه ؟؟؟

عَجِّلْ وِنْـزَل عَ الـميدان
يا أبو الياسْ يا فَـنّان
أزجالكْ حِـنّا نِـحِبّا
زَجَلك راقي وْفتّان

إنتِ حَيَّرتِ الإخوان
بيقولوا إنْ كانْ زَعلانْ
بِْـنِـبْـعَثْ أكبَر وَجاهَه
بِسعِدنا إن كان رَضيان

يا بو الطلعه الـبَهيِّه
يا بو الـهِمِّه النَّشميِّه
بْـأزجالك بِشفى العليل
يا شـمعِتنا الـمَضويِّه

ما بْتِحلالنا السَّهرِيِّـه
مِنْ دونْ بو الياسْ يا خَـيّـي
طالت غيبتك يا أمير
بو الياس يا نور عينـيّـي

[رحاب بريك]

شفتها وياريت ما شفت حلاها******حياتي يا عالم ما بتسوى بلاها

صدفه شفتها وجمدت بمكاني*******وألله مثل ما بلاني بحبها بلاها

[شحادة ناطور]

شفتا ع باب السرّ تستنّى
ونظرة قلق في عيون تتعنّى
تقللو حبيبي ليش ما طلّيت
فلبي ع نار الشوق عم يعنى

[وديع توفيق مرجية]

شفتها قاعدِه عَلى البير=عَمْ تـتصَيَّد عَصافير
صادَت قلبي عقلي طار=ما خَلَّت عندي تِفكير

[رحاب بريك]

شفتها تبكي من شوقها ألي شفتها***********ودموعها الحزينه بكفوفي نشفتها

تقلي روح بقى نشف الدمع بالعين **********بعرف ما عم تحكي من قلبها

حبيبة قلبي عم تحكي بس من شفتها

[نور عقل]

يا ريتني عميت وورايحة ما شفتها=قديش غنّيت لعيونا غناني
شو صار راحت ما ودّعتها=شو صار تا جمدت الكلمات عا لساني
يا زمان الآه وينو وعدها=من صغرك خوّان يا زماني

[وديع توفيق مرجية]

شُفتا الصُّبِح بَكّير في البستان=وِقْبالا بُلبُل عا غُصُن رمّان
قالت يَ بلبلْ غَنّي لَوليفي=وِخْتار لُـه بَلاّ أعذَب الألحان

[محمد علي الصالح]

شافها بالحفل لمّا كنـِت داعيها=وقالت من الكلام وكل كلمه واعيها
قالولي عنها شارده بافكارها= قلتلهم سارحه والرّب راعيها

[جوليت بدر]

شفتا عم بتقطف زهر ************* قلبي حبّا كل العمر

لما شافتني قبالا ************* عملت حالا بتسقي المُهر


شفتا بتصوّل حَبّا ************ قلبي من جوّا حَبّا

قلبا ما حنّ عليّ ************* ليش خلقتا ياربّا

[نجدي حاطوم]

شفتا بخيالي زهره الرمان

والريح يستنى ت يقطفها

بايدي مسكت الريح وبتحنان

حتى غفي بظلال شرفتها

[رحاب بريك]

شفتها ولحظها يجرح مثل سكينه************ ماشي وراها حتى ما تحس بسكينه

إلتفتت من لهفتي لما شفت وجه القمر**********وقعت على طولي وصحت تشفقها

دخيلك يا غزاله إمسكيني

[نجدي حاطوم]

شفتا غا خد الورد عم تحكي

والخصر مايل والهوى رواح

وصارت عيونك يا زهر تشكي

مشتاق عا صدر التعب ترتاح

[شحادة ناطور]

شفتا بايدا تعسعس الرمان
لمّا دخلت اليوم ع الدكان
قلتلها يا حلوة الحلوات
مسموح دخلك عسعس الرمان

[جوليت بدر]

شفتا عالدبكة نزلت تتمختر

واللحظ بيغوي والخصر مزنّر

قلتلا ياحلوة مشّي نتمَشْوَر

قالتلي : عليكن الله أكبر

[وديع توفيق مرجية]

شفتا بْطريقي وَنا رايِح عَ العمَل=لاقتْ حبـيـبا الْ قلبو فيها إنشَغَلْ
بْسُرْعَه تْنـيناتُنْ عانقوا بَعضُنْ بَعِضْ=ما قْدِرْتْ أعِدّ كَمْ قَبّلوا مِنِ القُبَل

[شحادة ناطور]

شفتا في الدبكة تلوّح في ايدا
والشال الأحمر عاقد ع جيدا
لمّا شافتني زادت تغريدا
وصارت تتلوّى شمال ويمينا

[نور عقل]

شفتها تمسح عرقها عن الخدّين
................خافت ليعرف جوزا يالخيانة
قالت يا دلّي شو صاب هالنهدين
...............يا ريتو الله قبل ما خننو عماني

[جوليت بدر]

شفتا بطلعة منجيلا

زغيرة وماني من جيلا

لحلفلا عا انجيلا

غيرا ما بهوى تاني

[شحادة ناطور]

شفتا تحلف ع الانجيل
والشعر الأشقر بيميل
قالت عن حبّك ما بميل
إن عشت وربّي خلاّني

[نور عقل]

شفتو بيطالع بيتا
وآني هلّي ربّيتا
قولولو شو بدّو فيّا
منعوني منمحاكيتا

[نور عقل]

شفتا عم تمسك هالرّيح
................تشدّو صوبا لتلعب
ريتو شعري كان الرّيح
...............وصدري لكفوفا ملعب

[رحاب بريك]

نور عقل يسلموا أديك

وجدت لديك قدره على الكتابه

كان كلماتك فيها لحن بدون لحن

سلسه تنساب عند قرائتها

بدون عقبات بالطريق

ولجميع ألمشاركين

جميل ما تكتبون زيدونا من شعركم

رحاب

[نور عقل]

شفت الكحلة الفعيونا
................بتناديني تا افرح
خايف اافرح وما القى
...............عشفافي للبسمة مطرح

[نور عقل]

نور عقل يسلموا أديك
وجدت لديك قدره على الكتابه
كان كلماتك فيها لحن بدون لحن
سلسه تنساب عند قرائتها
بدون عقبات بالطريق
ولجميع ألمشاركين
جميل ما تكتبون زيدونا من شعركم
رحاب

شفتو ردّك بالموضوع
..................عم يلمع متل قرابو
قريتو ويلي من حسنو
..................واقف عم بطرق بابو
قطفت الوردة من طيبك
.................تا ازرعها في طرابو
تاري ارضك شو حلوة
................كلشن فيها شو بيهوي ( بينحب )
مضوّي زي صحابو

[رحاب بريك]

شفتا الكلمه منك يا نور ********مضوي المنتدى عالصفحه براقه

وجهك خير يشع بنور *********** قصيدتك كلمه مزينه بأخلاقه

كل ورود الكلمه أحلى زهور ***** بيجودوا بالكلمه الخلاقه

جرجيت بدر البدور *********** لكلمتها بضلي تواقه

مرجيه ونجدي وشحاده بسرور****** كلماتن كلها أدب ولباقه

ومحمد هاك الناطور ************** بيشحن الزجل بالطاقه

وجامعنا إنت يا نور************** تقطف ورد من كل الدور


وتزرعنا بجنينة ( ألكلمه) أحلى باقه)

[جوليت بدر]

شفتا من الصبح بكّير

بترندح للعصافير

والله لآخدها وطير

ان عشت وربي خلاني

[جوليت بدر]

شفتو ماسك بالدبكي

عمللي بقلبي لبكي

انشالله ياربي بلكي

بيعشقني وبيهواني

[نور عقل]

شفتا في غيوم النعسانة
قطرة نِدي بتتغندر
نزلت عا نص جبيني
تبوّسني...الله أكبر

[شحادة ناطور]

شفتا عم بتلمّ زهور
حواليّ عم بتدور
قالت وينك يا ناطور
جايية لعندك هيمانة

[نور عقل]

شفناها عند الدّكان
.............عم بتنقّي تنّورة
يا ريتو عمري ما كان
..............قبل الحلوة الأمّورة

[نور عقل]

شافتني حامل همّي
................. وراسي في كفّي غفيان
قالت يمكن ما بدّك
.................غيرا لابوسة عا خدّك
.......حتّى ما تبقى نسيان

[وديع توفيق مرجية]

شُـفـتـا عَـمْ تِـعـجِـنِ طْـحـيـن
مـنهـا فـاحْ عِـطـرِ الـيـاسـمـيـن
يا ريـتـنـي الــعــجـيـنْ كُـنِــت
بــيـنِ الأيادي الـحِـلـويـن

[شحادة ناطور]

شفتا تمشي في الحارة
عم بتدخّن سبغارة
اعطيتها منّي إشارة
قالت ما انّك عجباني

[نور عقل]

شفتا بالجامع تصلّي
وكفوفا لفوق تعلّي
خلّت في قلبي علّة
ما يمحاها الزمانِ

[وديع توفيق مرجية]

شـفتا تْغاوِشْ حَماتا
وكَبشَـتها مِن شَعراتا
وْبِالأضافِرْ خَمشـتها
وْنِزْلو كْـتيرْ مِن دَمّاتا

[نور عقل]

شفتك عم تضرب فيها
شويّة مهلك عليها
الحلوة ما عمتعمل شي
حماتا هيّي بتغريها

[شحادة ناطور]

شفتا قعدت ع التنور
والعجينة عم بتفور
قالت وينك يا ناطور
دخلك ذقلي خبزاتي

[وديع توفيق مرجية]

شُـفـتـا مَرّه لَـلكِنّه
قاعدِه بِتفَدِّر جِـبـنِـه
وْبِـتغَنّي عا طول صوتـها
حَماه ما بِـتـفوتْ جِنّه

[نجدي حاطوم]

شفتا بنص الروح سهرانه

وتركت سلال القلب جوعانه

قلتلها بتتكمشي بالروح

يا جلنار العمر حليانه

[شحادة ناطور]

شفتا نزلت ع البستان
تا تحوّش كوز الرمان
قلتلها غصنك مليان
حلو وحامض لفّاني

[منال شامي]

شفتو بطرز قصايد ..
وفي كلّ قصيدة إسمي مكتوب ..
سألتو: ليش كتبلي كلّ هالجرايد ؟..
قلي: مَ تنغري مش إنتي محبوبي ..
إنتي وحدة من الجروب ...

;) :p

[وديع توفيق مرجية]

شفتا بشاشة التّلفِزيون
أجمل من مَلْكِة الكون
رقصَتِ لَوّعت لِقلوب
كلّْ مِن شافا صابو جنون

[رافع خيري حلبي]

بسم الله الرحمن الرحيم

من أجمل المبادرات التي تقومون بها في منتدى الكلمة
لصاحبه الشاعر الكبير الفيلسوف معين حاطوم المحترم
هذه المبادرات المتتابعة التي تثمر بأفكاركم الطيبة بوركتم
جميعاً وخاصة الأخ الشاعر نور عقل المحترم , فكانت
لي هذه المحاولة أرجو أن تنال إعجابكم.

شفتها نازله ع البحر تسبح
ونسيم الريح بداعب سناها
طلبت منها مكانها تبقى
وما توصل للبحر طعمة هواها
ونلحق البحر من ريقها يشرب
رح يحلو وملحو يكون فداها

واقبلوا جميعاً تقديري واحترامي.

رافع خيري حلبي دالية الكرمل بلد النور - حيفا.

[نور عقل]

شفتا عم تسلك دربي
.............عم تسرقلي من قلبي
يا حلوة هدّي شويّة
.............شو نفعي بلا حبّي

[وديع توفيق مرجية]

شُـفتا بالبَحَر سابْـحَـه
بْجَمالا الْ شافا ذابْحَه
مِنْ ريقا مَـيّْـةِ الـبَحَر
صارت حِلْوِه مِشْ مالْـحَه

[محمد علي الصالح]

شفتا ومن كلماتي تهاب
والصاير بيني وبينا
بغلطة فهما هالرّحاب
سالت دمعه من عينا

[نور عقل]

شفتا بتكثّر ملحا
...............عالطبخة الكانت عالنّار
فجأة حترقت هالطبخة
...............مدري فيها شو الي صار

[دريد دغش]

شفتا نازلة علبيدر
لحقتها نظرة فنّان
ويلي الحلوة بتتكبّر
عادريد احلى إنسان

[نور عقل]

شفتو طيفا في قلبي
............. عم يزرع صورة محلاّية
وتركتو على الدربِ
............. وعارف بالرّجعة جايي

[محمد علي الصالح]

شفتا عمّا بتنقل نقل
بكرجاتا بتخطم وتدور
بتفتش عن إبن عقل
وتنادي وينك يانور

:D:D:D

[وديع توفيق مرجية]

شُـفْـتـا تْـفَـتِّـشْ بـيـنِ الـنّـاسْ
عــا واحَــدْ إسـمــو مْـحِـمَّـدْ
انْ شـااللـه يْـكونْ هونْ أبـو الـيـاسْ
إلــحَــبــيــبْ إلـلّي بَـعْـبَـدْ

[نور عقل]

شفتك لمّا شفتا تصيح
................وتنادي عليّي باسمي
وقفت عيني ما بتزيح
...............عن وهجا هاك الرسمة
ولمًا لقيتا قلت منيح
..............رتاحت نفسي من العتمة

[وديع توفيق مرجية]

شُـفْـتـا بـيـنِ الـبَـسـاتـيـنْ
مَـعْ حَـبـيـبـا بْـتِـتْـمَـخْـتَـرْ
شـَمْسِ وْقَـمَـرْ مِـجْـتِـمْـعـيـنْ !!!
عَـبْـلَه الـعَـبْـسِـيِّـه وْعَـنـتَـرْ
**************
مَ احْـلـى تْـنـيـنـاتْ هَـ الْـحِـلْويـنْ
عَـبـلَـه وْفـارِسِ الأبْـجَـرْ
شُـفْـتُـنْ كـانـوا مِـتْـعـانْـقـيـنْ
وْمِـنْ ريـقـا عَـنْـتَـرْ بِـسْـكَـرْ
**************
شُـفْـتـو قَـبَّـلِ الْـخَـدّيـنْ
إلأيْـمَـنْ بَـعْـدو الأيْـسَـرْ
يا رَبّْ إجْـمَـعْ هَـ الـقَـلْـبـيـنْ
عَـبْـلَـه وْفـارِسْـهـا الأسْـمَـرْ
**************

[محمد علي الصالح]

شفتا لـْزَهراتا بتبيع
والزردي بدرهم خيي
كلّو كرمالك وديع
العاشق إبن المرجيــِّه

[رحاب بريك]

شفت الحلوه بتعليله

فوق شفافا هالضحكه

مثل البدر وضاويلي

ولما نزلت عالدبكه

صارت يمه تناديلي

مسكت إيد ملبكه

حتى اخر الليله

أفكاري منها مشربكه

يمّه فيها إحكيلي

من عيني بعطي الشبكه

قاتل لحظها يا ويلي

[نور عقل]

شفتا تميل وشمسا تميل
......................وعالخطوة الوحدة سويّة
لحتّى تعبت وطلّ الليل
......................وتركت للعين هديّة
غفيت بسريرا مقابيل
.....................جنوني الفيّو سريّة
وقت الصاح نجم سهيل
....................وينك شايف هالتمثيل
......دخلك شو بتعمل فيّي

[نور عقل]

شفتا وشفت شوقي يركض لعندا
شفتنا عند ما زادت عَـ عندا
عدنّي قلت هالحلوة ما عندا
قطرة ندي تا تسقي الحباب

[رحاب بريك]

شفتو راكب علحصان *********** خيال وأحلى فارس

مثل هالحب بينصان************ والله من فوق الحارس

ولعزوبيه بالنقصان************ لبسنا اليوم المحابس

[نور عقل]

شفتا في الميّي بتعوم
.............نسيو عيوني طعم النوم
يا نيالو لون المَي
............مش مثلي صافن محروم

[قاسم حاطوم]

شفتا ويا ريت العين ما كانت رأتْ
هذا الحلا وما كان فـــي حبو ابتلتْ
وياريت قلبــــــــــي كان نايم وقتها
حتى ينام بهالليالي اللـــــــــلي تلت

[وديع توفيق مرجية]

شُـفـتـا بِـتـقَـشِّـرْ تُــفّـاحْ
قــامِ الـعَـقِـلْ مِـنّـي ســاحْ
يـا ريـتْـنـي كُـنْـتِت الـلِّـبِّـه
وِاسْـنـانــا دُكـتـورْ جَــرّاح

[دريد دغش]

]شفتا وحبات اللولو عا صدرة مدلايي
بعيونا بريق الالماس وشفافا لشفافي مرايي
عوراقي مألفلا الف قصيدة وحكايي
شي يوم حتشوفيني انا والهوى
نتمرجح بالهوا وتقولو هيدا دريد بحبو جايي[/size]

[رحاب بريك]

شفت شويقي بين الرجال********** يزين محضر لرجالي

مثل النجمه ما بينطال ********* مضوي بعتم الليالي

ولو مره بغيابه طال *********** مدري شو يصير بحالي

بجن ما ببقى من العقال ******** بمشي وبحاكي بحالي

بروحي بفديه والأوصال********* تفدي قليبه وهو وكرمالي

لعيوني بيهدي موال ********** يوصل بصوتو لجبالي

يطال النجمه الما بتنطال******* يعلقها شكله بشالي

بفعله شهم كالأبطال *************كريم يحب العداله

شهم ما يهزه جاه ومال********* روحه تسكن بخيالي

يا هيك تكون الرجال ********** يا إما منهن بلالي

غالي علي هالرجال********* يحميه الرب العالي

[نور عقل]

شفت الشتي يرشرش همومو
---------------------------- تــا دمــوع الـفرقـة ما يدومو
ســاق الله على ايــام الخـوالي
---------------------------- كيف كنّا نحبّ والنّاس يلومو

[وديع توفيق مرجية]

شُــفْــتـا بِـتْـغَـنّـي لَـ بــوشْ
بِـتْـقُـلّـو هـيـه يــا نَـغْـنـوشْ
هـالـدّيــكْ الْ بـيـنِ الـجـاجاتْ
بِـتْـمَـخْـتَـرْ ريـشـو مَـنْـفـوشْ
حَـبـيـبـي شْـــوارِبْ مـالــوشْ
عَـرْشـو مِــنْ أَكْــبَـرْ لِـعْـروشْ
مِــنْ تَـواضْـعـو شِـلْـحِ الـتّـاجْ
بَـــدالــو لِـبِـسْ طَــربــوشْ
لَــلّــي مــا بـيـحِـبّـوهـوشْ
بـيـقُـلّْـهُـنْ مـا تِـزْعَلـوشْ
عَ الـبـيـتِ الأبـيَـضْ يـا حْـبـابْ
عـازِمْـكـو عِــنْـدي عَ كْـروشْ

[محمد علي الصالح]

شفتومش صافي ومغشوش
جايي ع العالم مدفــــوش
دخل سالم ع الـــعـــراق
مبيّن رح يطلع مـــطبوش

[نور عقل]

شفتا السّياسة بتمشي
............ بين حروفك وحروفو !
شو بدكو في السّياسة
............ فرجونا شو بتشوفوا

أتمنى من الأستاذ محمد علي الصّالح عدم التعديل على ما اكتبه !!! انا لا اسمح بذلك !!!!

[وديع توفيق مرجية]

شُـفْـتـا بِـتْـصـيـدْ عَـصـافـيـرْ
فـايْـقَـا مْـنِ الـصُّـبِـحْ بَـكّـيـرْ
بِـرْمـوشــا رَشْـقَـتْ قَـلْـبـي
خَلَّـت عَـقـلـي مِـنّـي يْـطـيـرْ

[نجدي حاطوم]

شفتها إتطيرلك عقلك
وتحتل شغاف بقلبك
لا تتحيّر لا تهتم
يمكن هي بتحبك

محبّتي يا أبا سامر
نجدي حاطوم

[ورد عقل]

شفت القمر مجافي النّوم=رايح جاي يعدّ نجوم
ناطر هالحلوة تا تطلّ=ومتمنّي يفرح شي يوم

[نور عقل]

شايف شفاف شفتا تغنّي=هرب صوت الجدّ منّي
قرّبت شفْتين عالشّفتين=تا تمرق من على شفافي رنّة

[نور عقل]

شافتني مع نسمة ريح=عم لفلفها برمشاتي
غارت صارت عم بتصيح=قلتلها بحبّك هاتِ

[نور عقل]

عم شوفا من قبال الشمس
تحاكي خيالا بصوت الهمس
مدري حبتني هالبنت
مدري فيها شو إلي حس

[رحاب بريك]

عم شوفا تضوي مثل الشمس
بحبا اليوم وبكره ومثلو الأمس
قعدت وشوشها بشوق الهمس
يا ويلي بوها علينا وحس
قلي يا نور أحكي معها وبس
إبعد ولا تقرب ممنوع اللمس

[سمير فياض]

كنت مسطح بالفيي
جنب النهر صبحية
شفتا نزلت عالميي
ماهي انس ولاجنية
ولامن الجنة حورية
قلبي قللي شوف وسكوت
وارضى بعمة وقتيي
انها المرة الاولى للكتابة بشكل مقفى بعض الشيء علني لم ابهدل الموضوع

[نور عقل]

الأخت رحاب بريك والأخ سمير فيّاض
مروركم له صدى ... شكركم
فكرة الموضوع هي تكوين رباعيّات تحمل كلمة شفتها او ما يشتق من ذلك ...
فاما ان تكون ميجنا تحوي شفتها
او رباعيّة زجليّة صدور البيتين لهما قافية وعجزهما لهما قافية أخرى
أو بالطريقة الأخير التي كتبت بها آخر رباعيّة أي ان لبيت الأول وعجز البيت الثاني بقافية واحدة وصدر البيت الثاني بأخرى
لكم مودّتي وتحيّتي

نور عقل

[نور عقل]

شفتها والضحكة على شفّة
ممايلة عم تشرق من ريقها شفّة
ولمّا شفتها طاب قلبي وشفي
وحبيّتها وما عملت حساب