تحدّي ع الماشي

[علي عامر]

سلام اخي المبدع

الشاعر نور عقل

يا نور شعرك نور وشرودو ملي * هـ الأرض وبسحر المعاني الكامله

لكن انا بيوتي أريج قرنفله * من برعم الإحساس وهج قلبي غلي

تفضل معي عا جولة معنّى قصير * ت نشوف مين على الشعر يصبح ولي

[نور عقل]

اهلا اخي ... بكل ود ...

عالمعنّى غنّت ورود ممايلي ** وبلّشت بالدربكه والترغلي
جينا تا نحكي شعر مآصلي ** ونبرز عالمنبر معدّلك ومعدّلي
لكن من وقت ما بلّشت انا ** انصطولي وزتّوك برّا يا علي

الموضوع مثبّت ...

[منال شامي]

يا علي شعرك دايماً عامر
وقلم نور عَ طول مجروح
وفِ شِعرك الخير وفِ قلمو البركه
وعَ عرش الشعر متربعه انا ملكه
آسفه لتطفّلي ههههههه
تقبّلا تحياتي
منال شامي

[نور عقل]

منال المبروزة شمس تتعالى ** من الشرق للغرب وشو عبالا
ترقّبي قلام شعري كيف بتنتصر ** كيف الكلمة رح تشبع سؤالا

اشكر "تطفّلك"

انتظرك يا علي :)

[منال شامي]

يا نور يا بدر مشعشع
اكتب وزيد وهالمنتدى بشعرك شعشع
ويا قلمي اكتب وملّي
ومن كِلْماتي حبرك ملّي
ويا وْراقي من قلمي مَ تْمِلّي
تنوقف سوا فِ وجه الذياب..
المتطفّله منال شامي

[علي عامر]

يا شعر بيّك عاد يزرع من جديد * حب الوفا في حقلة معنّى وقصيد

وع قبال منّي نور قدّيشو زهيد * وشاعر انا عالي المكانه شي أكيد

وبمعركة افكار للشعر الطلي * يا منتصر رح تصبح بلحظه شهيد

تحيّاتي اخي نور والاخت منال هلا بأهل الشعر

[نور عقل]

الشهادة للشهيد ان الرب قلّو ** نبتت شجر عم تراقص جنب ضلّو
ومن صفا حروفو عم يطلع محلّو ** نار تسطع في الكون كلّو
رح ابتدي بزجل فخر تا قلّك ** مين البعد التحدّي حروفو رح يصلّو

[علي عامر]

لمّا الشعر بيكون بحروفو صلا * بيكون قلبي معبد وديني الوفا

وحروفك بيتلو الآيي ع الملا * تا يربحو من طهر افكاري الصفا

وت تأمّن الفردوس وتعيش بـ علا * ثابر بالعباده وم تقدّم جفا

[نور عقل]

موجي يا غيوم فوق معلقا ** سماكي كنز من غربا لمشرقا
ويا غصون حملي حبّي عالطراف ** لا تحملي براسك حبل المشنقا
قومي يا ريح وفهمّي ابنك ** انه الحياة فيي بتنتقا
والدين كلّو تا يعرف منيح ** كيف الأصول وكيف التفرقة
لازم يجينا خبر تا قلو كمان ** روح لعلي تا تعلمو يباري
ويمسك سيف بيمينو مش مطرقه

ههههه تحيّاتي ... واهلين بالروح الرياضيّة يا اخوي :)

[علي عامر]

ههههههه

حلوووووووووو اخي نور

يا سر الهامي انجلي عا صفحتي * وترغل ي بلبل رح بعيرك جرحتي

وخبّر ولاد الشعر عمر وابتكار * وحدي اله الموهبي وبخبرتي

رح شعّل المحل ل بشعرك بالخضار * ومش بالمطرقه يمّا بسيف وحد نار

لكن ببطش الشعر من عزمي الفتي

[نور عقل]

لسان النار عم يعلى لهيبو ** وعـ المعركة حميان ثار
لكن المسكين بدو طبيبو ** يداويله جرح بيمينو صار
نور الكلمة مش رح تصيبو ** ولا لسان بينقط من طرافو نار
فيّي المعرفة ليشو نحيبو ** قايل الـ عن شكلي شو بجيبو
عـ تحدّي عم يشهدوله كثار

[علي عامر]

يا شعر نورك ليش عتم بالمجال * وجايي لحـتى يشيل حملات الثقال

وشاعر انا سبع المعاني والكمال * بوقت الحرب والفقر ما بيرحم غزال

خلّيك عاقل لا تغلغل بالدلال * واحلم بخير الشعر واتروك المحال

ع قبالك الجرح الوفي بقلبي نضال * ولهبة مشاعيل القداسه للمنال

ولا تضل تغلط بالحكي بيناتنا * انا اللي بيغلطو بزتّن بالجبال

[نور عقل]

عيوني غضبهون كيف ثارو *** لما الخريف يقطّف ثمارو
قديش قلت لا تثور بكّير *** اسمي لهلّئ ما بيفضا مزارو
وجرحك غليلي بحملو هالثفيل *** ودوا الجرح من وين دارو
يا ليل اختفي لا تخاوف المسكين *** واقف عمفرق عم ينطر نهارو
بيفكّرو الطلعة مثل فوتات هالتلوين *** في خطوط يلفلفو بسمات محتاجين
شعري لحتّى يعرفو وين صارو :)

[علي عامر]

دخيلك يا غيوم الحلم شتّي * صارت بور أرض الأمل والنور

وي فكاري على هـ الجهل فتّي * وهج تا يزدهر هـ الإسم نور

ما بدّي جهول الشعر باري * رغم ما كنت عظم الخصم باري

انا شاعر بعرقي المجد جاري * دمّو وبسكوت الجمر مغمور

يا نور روّق حدّك الجبّار * بيدو بطش هـ الدّهر صفّا غبار

بليل التحدّي تاج للشعّار * وجرحو كتب للموهبي دستور

[نور عقل]

الجهل يا خيي بعيد عنّي *** فيي الفهم والعقل منّي
جبّار إنتي لإنك بحدّي *** جبّار اليوقف قرب فنّي
دستور الشعر سوّيته مخدي *** ينيّم الليل وبصير غنّي
ومجد الجاري بعرق ضدّي *** خلاّ العرق يصير ينّي
ما بتشتي غيوم الحلم هدّي *** بتيصل لنهاية بالتأنّي
انا للشعر اسمي تا ودّي *** بفتفت اليحكي للناس عنّي
وكل مين بيدخل تحدّي *** يحوّل البحر مي وردي
يحرم شفافو ويحلّي سنّي

[علي عامر]

وهلّق بعد م الدهر بالشعر انسجم * بدّو القدر من بطش حرفي ينرجم

ويا نور ي اللي بسر شرداتي انلجم * مهر الفكر عندك وقلبك منفجم

لو كنت مارد عاصف بجهلو هجم * صوب الثقافه بكلمتي وعتمك نجم

من نور فانوسي المفلسف رح تضيع * بدنيا غريبه جنح برغش تنحجم

[نور عقل]

مش غريبة تشوفني جايي ورافع علم ** علام حمرا ونار عا روس القمم
ولمّا سيوفي بصدر المعركة بتنغرم ** من ضرب الروس رح يطلع نغم
يا علي لملم حروفك لبتنادي العَدَمْ ** من حرفك شايف على شفافك ورم
لا تكتب بقلام بالذهب مطرّزي ** آخرتو يموت بديّاتك هالقلم

[علي عامر]

اسف على التأخير لقد انشغلت ببعض الغزليّات

ي نور ل عم تجرّب بالعباره * تهاجم شاعر الحكمه المثالي

لشو ت تراشق الإلفه حجاره * م بيتك يا عيوني قزاز غالي

كفى بأفكار ما فيها شطاره * تزعج شردة نبوغي وخيالي

توقّا تضل بعنادك الغاره * عليي تشن وتجول بمجالي

انا بارع بضربات المهاره * بصيدي بكلخ قرون الغزاله

ي نور ل قلب اسمك ع الحراره * حرارة ثورتي ولهبة نضالي

عتم موزون ع وتار الجيتاره * وغباشه مشحّره بلون الليالي

انتصح منّي ي بو دموع الحيارى * ارحم جرحك وغنّي ليالي

انت مش قد مردان الجساره * ل بحرب الفكر دمّن جمر غالي

[نور عقل]

انا الموج الـ يغطي الحِجارَة ** انا الورد الـ يغلا عبيرو
انا الشمس من قلبي الحرارة ** انا للتحدّي بقرّر مصيرو
انا يا علي غمزات المنارة ** قارب بحر بحدّدلو مسيرو
بالقلم بعرف ضربات المهارة ** مش بهلوسة حالم سريرو
ورشقات حبر هودي الغارة ** رماهن شاعر مسطّر ضميرو
انت كلمة بتدّور عا حارة ** فيها حكي عم يعطي لغيرو
عا قدر ما تبيّن في سطرك إثارة ** اسمي بلحضة سطرك يثيرو
وهج المعاني بيلهّب النارة ** مقابيلك بضوّي ووجهك تديرو

[علي عامر]

حظك حلو ما فيش منبر يا رفيق * حتّى صداحي يبل للعطشان ريق

وحاكي السما بالارتجالي المنوحي * وعبّد لأهل الفلسفه بشعري طريق

حظك حلو قلبي هني طيّب رقيق * وبشفق ع محل الدهر بالظرف الدقيق

لكن اذا تماديت يا خمس العقل * عواصف جنوني بتلفحك رغم الثقل

وبتشلحك مخلوع عا أبعد مضيق

[نور عقل]

عطشان صداحك ما منو مصير *** حظو مثل ورقات البصل
ودرب حرفك يا علي منّو خطير *** دخلك قلي لتسكت شو العمل؟
وظروف التشفق عليها ما تصير *** من وحي المعاني والجمل
تعا تا علّمك ظربات سيف الزير *** شوف الحرف الـ ينقط من جنبو غزل
وعقلي يا علي قوي في التدبير *** ثقيل وعواصف فكري ما بتدير
الثقل وينو في ريحك ثقل ؟

[علي عامر]

من بعد م ضربنا بسيف المرجله * جرود وسواحل والفدا دمّو غلي

قاصد على موضوع سرّ المسئله * فيه انفضح تا صار منّو مشكله

غيم الهدى دمعو من الحرقه سلي * وصارت جروحو جمر قهر وبلبله

ما بين اسود بالخفايا مبتلي * وبين البياض الناصع بهـ المرحله

نقّي شو بدك يا عقل ع الحالتين * نور ان كنت بطفيك بالسطوه علي

[نور عقل]

رح بنتقي من السلّة أطيب عنب ** كلام مزيّن بغنجات الفؤاد
طلبتني يا علي تا لبّي الطلب ** برمش عيني رح بقلّك هالمراد
لون الليل الـ شمساتو قلب ** لون الحجر حولو بيلف العباد
عباية سهر وزنّار الذهب ** بيتراقصو بين جوقات العناد
ازرع بجنب هالخيمة وتد ** احسن الك من كفن لونو برد
شوف الصفا من جوّا قلب السواد

[علي عامر]

بنت المعنّى بالليالي الحالكه * بدر وغزي جرح الحشا بالمعركه

واهلا بنور على دروب مشوّكه * وروح التحدّي من نبوغي محرّكي

انت اخترت أسود ضمير المملكه * وبيضا قلوب الناس رغم الدهدكه

والليل خافي سهام جرم مشكشكه * وسمّ النوايا السود منّو منشتكي

وعباد لفّو حول سودا هـ الحكي * صخرة الدين ل بالنقاوه مباركه

مظهر ولكن جوهرا ناصع زكي * عطر الطهر بيفوح منها تكتكه

وعتقت عبايي بالسواد محيّكي * وحلّ بحلا الرقصات تا ينسى البكي

فسطان أبيض بالحنان الليلكي * زاح القهر وغباشتو بحنكة ذكي

ويمكن لأنّو الليل عيبك ستّرو * شفت الصفا من عتمتو الملبّكه

[نور عقل]

ما في حدا عندو عيب وفسّرو ** عيبي وعيبك عتم هالليل مستّرو
لكن بياضك يا فستان بفكّرو ** كذب أبيض واقف خيالو بأخرو
وحجر اسمو الأسود بيقدّرو ** رفعو المباني حول منّو وكبرو
حتى نشوف اهل الحج يقرّرو ** يدورو يبوّسو زوايا اتطهّرو
وهالّيل منّو سم ابيض حظّرو ** تا تخلط السمّات نهارك نوّرو
شو جاب قلوب بالطهارة تنكّرو ** لعيون سود ورموش يفرفرو
يا علي لولا المحابر ما تعصّرو ** وحبر اسود ضحك صعب تغيّرو
ما كان لشعرك اسمو ومصدرو ** وما كان وراقك البيض تسطّرو
وقلب التمر اسود لو ما تقشّرو ** طعم السعادة تذوقو حتى من مظهرو
شايف يا علي كيف الأسود بنوّرو ** لحاف الدفى في برد ليلك مليح
تا جغنك عا سواد البُبّو تسكّرو

[علي عامر]

اخي نور

اسف على الإنشغال والتأخير

واليك الرد

الكذب اللي عم تحكي عن مجالو الدّني * بس بالإسم ابيض ولكن هـ الدّني

زرعت سوادو بالجروح المزمنه * افتكرت بيجبر خاطر بيقلب هني

وعا قد م الاسود مقدر شو سني * اللفه اللي حولو دايره بكل سلطنه

رمز النبي رمز العفاف ومؤمنه * روحك بقدسيّة طهاره متمنه

وعيون سود النظر فيهن معتني * يشوف النقا بأبيض نوايا ماكنه

وابيض العين بيوسع الاسود جني * مواسم الرحمه وحول منّو مأمنه

وحبرك الأسود من عدا الفكر الغني * بأصفا صور من شاعريي مبيّنه

بيبقى حبر فاضي على الماضي فني * وم بيزهر بلونو بظروف متشرني

وتمر الحلا الأسود حنانو ما عني * قلبي متل صبر البياض ولو جني

وجفني للي سكّرتو على عينين سود * ابيض حمي عيوني جميلو بالدني

[نور عقل]

حبر المحبّة أسود حروفو مترجمة ==== من دمع راس القلم جوّا المقلمة
ولو كان حبر ابيض من القلم دمي ==== تا تفهم المعاني كم من واحد عِمي
المَعْلَمِة بثياب سود بالذهب مكمّمي ==== مش بثوب الكفن تبقا المعلمة
وهالعمامة البيضة كيف تبقا معمّمي ==== لولا العباية تكون سودا مقلّمة
والعيون الحور قديش فيهن رِمي ==== قصايد غزل مثل دوا الدَمدَمة
مش رح كون يا علي لبياضك مهزمة ==== كونا حدود النهار سودا معتَّمة
ظروفك يا سواد العين حولك يرتمي ==== سحر كذّاب ابيض يهوى التمتمة
ما بعتقد بعد اليوم عن غير السواد ==== في شخص يقبل بياض مساومة

أخي علي بعتقد انه تا تدافع عن البياض عم تستعمل " كيبورد " سوداء ههههه وان لم تكن سوداء الحروف المنقوشة تكون

تحيّاتي

[غدير قنطار]

بسم الله الرحمن الرحيم
ولله انكم روعه يعطيكم العافيه
تحياتي
تقبلو مروري
غدير قنطار