البحر لروح الصديق حسين عواد

[نجدي حاطوم]

البحر

كان البحر مثل الحلم

بيّ وصبي عالشط عم يتصيدو

دق القدر عالميّ

واهتز البحر

وهاجم جيوش البر

في مواج القهر

البيّ اختفى في الميّ

بيقولو صرخ

استنى عليّ شوي

ت شوف الصبي

سمعت ملايكه السما

قال القدر انتو ارجعو

وصار البحر يرغي زبد

مثل الكفن ت كفنو

وظل الوجع نايم على شط الرمل

ونزلو دموعو للصبي

صارو من حجار البحر

عم ينطرو

بلكي اذا مر الوقت

ايد القدر بترجعو

يضحك على مواج الغدر

[شحادة ناطور]

يا إمي سامعة هالصوت جايي
ما بعرف مين بينادي عليّ
قمت من نومتي مشغول بالي
ما بعرف ليش عم بهدس في بيّي
يا إمي خايفة من حلم شفته
ما جاني نوم ولا غمضت عينيّ
اجاني طير رفرف في جناحه
ع باب الدار عم يسأل عليّ
قلت تخمين جايب لي بشاير
قصص واخبار أو حامل هدية
قمت تا اسأله يا طير قوللي
شو جايب لي معك بشرى هنيّة
ولما وصلت يا إمي لحدّو
شفت ع جوانحه صورة لبيّي
ما فيّي كان اسأل إيش مالو
تركني وطار ما استنى هنية
يا إمي خايفة جاييه لعندك
دخيلك طمّني قلبي شويّة
قوليلي ليش عم تبكي يا إمي
برضاك ببوّس ايديك الطريّة
يا إمي ليش هالفزعة لعنّا
بكا وصياح والدمعة سخيّة
قوليلي وين كرمي مش معاك
زلمة البيت لما يغيب بيّي
بيكفي صياح يا إمي ارحميني
رياح الخوف عم بتشت فيّي
يا كرمي قول وين بيّّّّّّّّّّي تركته
ع صيد السمك رحتوا من عشيّة
شايفتك واقف بتبكي لحالك
ما عمرك يوم قصّرت بقضيّة
قولولي وين بيّي لا تخبّوا
قولولي هالحقيقة وين هيّي
أنا في دموعكم شفت الحقيقة
وما فيّي غير أصبر ع البليّة
يا إمي الطير هالشفتو بمنامي
إجا ع الصبح تا يفتّح عينيّ
إجا تا يقول جايبلك رسالة
الأمانة راجعة لربّ البريّة
الجسم بيموت ما بيبقى ع حاله
كاسات الموت تتوزع سويّة
يا إمي اليوم بيّي لحق جدّي
في دار الحق ع جناح المنيّة
يا بيّي ليش عجّلت برحيلك
ما عمرك يوم رحت بلا تحيّة
يا بيّي الدار ما بتنفع بدونك
يتامى تركتنا بحسرة وأسيّة
مها لمين بدها تقول بكرا
في يوم العرس ادعيلي يا بيّي
وإذا كرمي ع صيد السمك بدّو
لمين سحضّر شباكه القويّة
وإذا الولاد طلعوا ع المخيّم
ما فيهم يفرحوا برحلة هنيّة
أنا لمين بدّي اهدي كتابي
حكايا البحر وأسراره الخفيّة
حكايا الكنت تحكيها يا بيّي
ع موج البحر وصخوره العتيّة
يا بحر بعاتبك خنت الأمانة
بدل ما تكون صحبتنا صفيّة
ما كان يكفيك شو عندك لألئ
ذهب وكنوز أمواجك عاليّة
ما كان لك غير تطمع في ليال
وأنا ما ليش في الدنيا إلاّ بيّي
أخذته كان ع صخرة يناجي
سماك البحر في لحظة وضيّة
هدمت بيوت يتّمت الطفالى
زرعت الحزن في قلوب الفتيّة
أنا يا بحر عم ابكي الليالي
دموع العين عم تنزل نديّة
ما عندي ظلّ غير دموع تجري
ودعاوي بقولها صبح ومسيّة
إذا منموت ومنخلق يا ربّي
في هذا الكون والدنيا البليّة
وإذا في يوم طفل صغير شفته
مع الأطفال عم يدرج سويّة
باركض صوب منّو وقول بلكي
هالطفل هاللي جاي بيّي
يا ربّي يكون بيّي كان حظه
في جيل جديد مع عيلة هنية
ويخلق عند إم يكون عطفا
مثل إمي الحنونة والرضيّة
يا إمي إن كان بيّي رحل عنّا
وتركلك هالأمانة ف عنق خيّي
كرمي قد هالحملة يا إمي
معك رجّال حامل مسؤوليّة
في عيلتنا ترك بيّي معاك
ثلاثتنا مها وكرمي وليال
رضينا بحكم ربّي والمنيّة

[ميرا ناصر]

يا بيّي ليش عجّلت برحيلك
ما عمرك يوم رحت بلا تحيّة
يا بيّي الدار ما بتنفع بدونك
يتامى تركتنا بحسرة وأسيّة

رائع ما كتبتم والحقيقة نزلت دموعي بدون وعي مني ...
اصعب شيء في الحياة هو الفراق ولكن ما باليد حيله هو القدر
وهذه الكأس لا بد ان نشربها
.......

تحياتي لكما

[علي عامر]

اخي الكبير نجدي

انسان وشاعر

عطر الشعر المميّز

- البحر -

[نجدي حاطوم]

اخي شحاده ناطور

شكرا لك من القلب





مجبتي

نجدي حاطوم

[نجدي حاطوم]

يا بيّي ليش عجّلت برحيلك
ما عمرك يوم رحت بلا تحيّة
يا بيّي الدار ما بتنفع بدونك
يتامى تركتنا بحسرة وأسيّة

رائع ما كتبتم والحقيقة نزلت دموعي بدون وعي مني ...
اصعب شيء في الحياة هو الفراق ولكن ما باليد حيله هو القدر
وهذه الكأس لا بد ان نشربها
.......

تحياتي لكما

ميرا ناصر

ننتظر عودتك الى الكلمه

محبتي

نجدي حاطوم

[نجدي حاطوم]

اخي الكبير نجدي

انسان وشاعر

عطر الشعر المميّز

- البحر -

الشاعر علي عامر

الابداع في مرورك وكلماتك الياسمين

محبتي

نجدي حاطوم