تعبان أوى م الوليه ...... مها ضرار

[مها ضرار]

يا خالق البرية
تعبان اوى مـ الولية

بتعكر دمى دايما
و تخلص عـ المهية
الظالمة المفترية
داخلة فـ مية جمعية

و كل يوم مشاكل
و أنا خايف من قضية
تخلعنى و ابقى ضايع
مخلوع و بلا هوية

إيدها تقيلة و رزيه
تمشى عمارة معديه
لو صوتى بس يطلع
بتهد البيت عليا

دى بتقعد عـ العيال
لو غلطوا فـ السؤال
أو راحوا للبقال
أو جريوا فـ يوم علية

بتخلص كل الأكل
و لا أجدع أسرة نمل
تعشق خناقات الأهل
و بتشترى الأذية

دايما جايبة الجيران
و تذيع زى الأعلان
رغى و لت و إدمان
للكدب و للبلية

فـ البيت دايما أنضف
أطبخ و أغسل و أشطف
لو أكون فـ الحق مُـنصف
بتنيمنى فـ نملية